කන්නගර දරුවන් කරන්නාවූ පුජනීය මෙහෙයුමෙහි අපට නිහඩව සිටිය හැකිද??

මෙය පොහසතුන් හා දුපපතුන් අතර ඇතිවන්නාවූ අරගලයක් නොවේ,මෙය මුදල් ගෙවා ඉගෙන ගන්නන් හා මුදල් නොගෙවා ඉගෙන ගන්නන් අතර ඇති අරගලයක් නොවේ,මෙය උගතා හා නුගතා අතර ඇති වූ අරගලයක්ද නොවේ. මෙය ආත්මාර්ථකාමීන් හා පරාර්ථකාමීන් අතර ඇති අරගලයයි.කන්නගර දරුවන් කරන්නාවූ පුජනීය මෙහෙයුමයි.මෙය රජයේ විශ්වවිද්‍යාලවල අධ්‍යාපනය ලබන ළමුන් පෞද්ගලික අංශයෙන් අධ්‍යාපනය ලබන ළමුන් කෙරෙහි ඇති ඊර්ශියාව හේතුවෙන් කරන්නාවූ අරගලයක් ලෙස විග්‍රහ කිරීම කිසිසේත්ම සාදාරන නොවේ.මිලක් නියම කල නොහැකි අධ්‍යාපනය සදහා මිලක් නියම කිරීමට විරුද්දවත් ,නිදහස් අධ්‍යාපනය අයිතිය ආරක්ෂා කිරීමටත් කරන්නාවූ අරගලයකි...

රජයේ විශ්වවිද්‍යාලවල අධ්‍යාපනය ලබන ළමුන් පාරට බැස කෑගසද්දී...
බැටන් පොලු පහර දෙමින්,කදුළු ගෑස් ප්‍රහාර එල්ල කරන පොලිසිය,
“මුන්ට වෙන වැඩක් නැතැයි” චෝදනා කරන මහජනයාත්,
මේ අරගලයට පිටුපස දේශපාලන බලපෑම් තියන බව කියමින්ම ප්‍රශ්නය අතිනතට යවන දේශපාලකයින්,
මෙය ඊර්ශියාවෙන් පෙලෙන දුප්පත් කොල්ලෝ කෙල්ලන්ගේ සටනක් යැයි හංවඩු ගසමින් අඩු තක්සේරුවට ලක් කරන පෞද්ගලික අංශයෙන් අධ්‍යාපනය ලබන කොල්ලෝ කෙල්ලනුත්,

එක් දෙයක් අනිවාර්යෙන්ම දැන ගත යුතුයි.මේ පාරට බැස කෑගසන ළමුන් අතරේ සිටින්නේ එදා වේලට කන්න නැතිව සිටින දුප්පතුන්ගේ දරුවන් පමණක් නොවේ.නිදහස් මතදාරී මධ්‍යම පන්තික ළමුන් මෙන්ම පරාර්ථකාමී සිත් ඇති පොහසත් දරුවන්ද සිටිති.හෙටදින ලක්මවට උපදින දරුවාගේ නිදහස් අධ්‍යාපන වෙනුවෙන් ඔවුන් කෑ ගසමින් දහදිය ලේ වගුරති.ඔවුන් තමාට ලැබුණු වරම අනෙකාටත් ලැබිය යුතු යැයි සිතති...විශ්ව විද්‍යාල තුළ ගානට තමාගේ වැඩේ පමණක් කරගනිමින්.තිබෙන විභාග පැවරුම් වෙලාවට කරගනිමින්,නිදහස් වෙලාවේ විනෝදවෙමින් සිටින කොල්ලෝ කෙල්ලෝ අතරේ පාරට බැස ගුටි කමින් මේ කෑගසන්නේ තවමත් කන්නන්ගර රුධිරය ඔවුන්ගේ ඇග තුල දුවන නිසාය..

තමන් කැමති අධ්‍යාපනය තමන් ලබා ගත යුතුය. විශ්ව විද්‍යාලය වරම අහිම වීම යනු තමාගේ උසස් අධ්‍යාපන අවස්ථාව නිමවීමක් ලෙස සැලකීම නොවේ.z-core දශම ගණනක අගයක් අඩුවීම හේතුවෙන් තමන්ගේ අධ්‍යාපන සිහිනය අහිම කිරීමට කිසිවෙකුට අයිතියක් නොමැත.නමුත් අධ්‍යාපනයේ වටිනාකම මුදල්මත තීරණය කිරීම නොකලයුත්තේය.තමා ලැබිය යුතු අධ්‍යාපනය තීරණය කල යුත්තේ තමාගේ දක්ෂතාවය මිස තමාගේ අතෙහි තිබෙන්නාවූ මුදල් මත නොවේ.

එදා පත්මසිරි ත්‍රිමාවිතාණ,නිමල් බාලසුරිය,බන්දුවර්දන ඔරුවල,රන්ජිත් පෙරේරා,වෙනුර එදිරිසිංහ,නිෂ්මි වැනි වීර ලක් මවගේ පුතුන් දිවිපිදුවේ කුමක් සදහාද?

ඔවුන් ඔබ සිතන ආකාරයට ආත්මාර්ථකාමී වූවානම්,වෙන වැඩක් නැති අය වූවානම්, ඊර්ශියාවෙන් පෙලෙන චරිත වූවානම් අද දහස් ගණන් ලක් දරුවන් නිදහස් අධ්‍යාපනය තුලින් වෛද්‍යවරුන් වන්නේ නැත.එදා ඔවුන් තම බෙල්ල දී දහස් ගණන් දරුවන්ගේ බෙල්ලෙහි වේද නලාව රැදවුහ.අතේ මුදල් තිබු පමණින් කඩේ බඩු ගන්නාක් මෙන් අධ්‍යාපනය ගත හැකි යැයි සිතන්නාවූ බොහෝ දෙනාට නිදහස් අධ්‍යාපනය හාස්‍යකි;දුප්පතුන්හට නොමිලේ ලබාදෙන්නාවූ ආධාරයක් ලෙස ඔවුන් සිතා සිටිති.නිදහස් අධ්‍යාපනය මෙරටේ බහුතර ජනයාගේ හද ගැස්මයි.රජයේ විශ්ව විද්‍යාලයේ අධ්‍යාපනය ලබන සියලු දෙනා දුප්පතුන්ද නොවේ; පෞද්ගලික අංශයෙන් අධ්‍යාපනය ලබන සියලු දෙනා පොහොසතුන්ද නොවේ.තම දරුවාගේ උසස් අධ්‍යාපනය වෙනුවෙන් තම නිවාස ඇතුළු සියලු දේපල උකස් කරමින් වියදම් කරන්නාවූ දහස් ගණන් දෙමව්පියන් අප රට තුල සිටිති.කුඩාකාලයේ සිට තමන් හට තිබුනාවූ අරමුණ,ඉලක්කය,ආසාව සියල්ල සුළු ලකුණු ගණනක් අඩුවීම හේතු මත සුනුවිසුනු කරමින් රජය විසින් ලබාදෙන්නාවූ පාඨමාලාව තුලට එක් වෙමින් අකැමැත්තෙන් ඉගෙන ගන්නාවූ දහස් ගණන් දරුවන්ද මේ රට තුල සිටිති.තවද රජයේ විශ්වවිද්‍යාලවල අධ්‍යාපන ලබන අතරම මුදල් වියදම් කරගනිමින් පෞද්ගලික අංශයෙන් උපාධි හදාරනවුන් බහුතරයක්ම සිටිති.මේ තත්වයන් වෙනස්වන තාක් අප රට තුල නිදහස් අධ්‍යාපනය පවතින්නේයැයි කිව නොහැක.
මෙය එකිනෙකා විවේචනය කරගන්නා හෝ චෝදනා කරගන්නාවූ අරගලයක් නොවේ..
මෙය බුද්ධිමතුන්ගේ අරගලයයි...
සහෝදරත්වයේ අරගලයි..
මෙය ඔබ රජයේ විශ්වවිද්‍යාලවල අධ්‍යාපනය ලැබුවත්,පෞද්ගලික අංශයෙන් අධ්‍යාපනය ලැබුවත්, මුදල් ගෙවා අධ්‍යාපනය ලැබුවත්, මුදල් නොගෙවා අධ්‍යාපනය ලැබුවත්,හෙට ඉපදෙන ලක් මවගේ දරුවා වෙනුවෙන්; එනම් අපේම සහෝදර සහෝදරියන් වෙනුවෙන් කරන්නාවූ ඔබ එක්විය යුතුම අරගලයයි..

රටේ නිදහස් අධ්‍යාපනයේ නාමයෙන් අකුරු කරන බාල පරම්පරාව බිය විය යුතු නැත.මන්ද පරාර්ථකාමී සිත් ඇති ඔබේම වැඩිමහල් පරම්පරාව හෙට දින ඔබගේ නිදහස් අධ්‍යාපන අයිතිය වෙනුවෙන් අඛන්ඩ සටනක සිටින බැවිනි.